పొంగులేటిపై చర్యల డిమాండ్
లోక్ భవన్లో గవర్నర్తో భేటీ
మైనింగ్ అక్రమాలపై ఆధారాలతో వినతి పత్రం
హైకోర్టు జడ్జితో విచారణకు విజ్ఞప్తి
హైదరాబాద్, మార్చి 30 (భారతవాసి న్యూస్): రాష్ట్రంలో రాజకీయంగా సంచలనంగా మారిన మైనింగ్ అక్రమాల వ్యవహారం కొత్త మలుపు తిరిగింది. కాంగ్రెస్ మంత్రి పొంగులేటి శ్రీనివాస్ రెడ్డిపై ఆరోపణల నేపథ్యంలో భారత రాష్ట్ర సమితి ఎమ్మెల్యేలు, ఎమ్మెల్సీలు గవర్నర్ శివ్ ప్రతాప్ శుక్లాను లోక్ భవన్లో కలిసి ఫిర్యాదు చేశారు. ఈ సందర్భంగా మంత్రి చేస్తున్న అక్రమాలపై సమగ్ర వివరాలతో కూడిన వినతి పత్రాన్ని గవర్నర్కు అందజేశారు. ఈ భేటీలో బీఆర్ఎస్ వర్కింగ్ ప్రెసిడెంట్ కేటీఆర్తో పాటు మాజీ మంత్రులు, ఎమ్మెల్యేలు, ఎమ్మెల్సీలు పాల్గొన్నారు. మంత్రి పొంగులేటి నిర్వహిస్తున్న మైనింగ్ కార్యకలాపాలు నిబంధనలకు విరుద్ధంగా జరుగుతున్నాయని, వేల కోట్ల ప్రజా సంపద దోచుకుంటున్నారని బీఆర్ఎస్ నేతలు ఆరోపించారు.
అక్రమ మైనింగ్కు సంబంధించిన పలు సాక్ష్యాధారాలను గవర్నర్కు సమర్పించినట్లు తెలిపారు. అనుమతులు లేకుండా, నిబంధనలు ఉల్లంఘిస్తూ మైనింగ్ కొనసాగుతోందని, దీనివల్ల ప్రభుత్వానికి భారీ నష్టం జరుగుతోందని వివరించారు. ప్రజా వనరులను కాపాడాల్సిన బాధ్యత ఉన్న మంత్రే ఇలా వ్యవహరించడం ఆందోళన కలిగిస్తోందని పేర్కొన్నారు. ఈ వ్యవహారంపై పారదర్శకంగా విచారణ జరగాలని బీఆర్ఎస్ నేతలు డిమాండ్ చేశారు. ముఖ్యంగా హైకోర్టు సిట్టింగ్ జడ్జితో స్వతంత్ర న్యాయ విచారణ చేపట్టాలని గవర్నర్ను కోరారు. ప్రభుత్వం నిర్వహించే విచారణపై విశ్వాసం లేదని, స్వతంత్ర సంస్థల ద్వారా దర్యాప్తు అవసరమని అభిప్రాయపడ్డారు. మంత్రి పదవిలో కొనసాగుతున్న సమయంలో విచారణను ప్రభావితం చేసే అవకాశం ఉందని, అందుకే ముందుగా ఆయనను పదవి నుంచి తొలగించాలని డిమాండ్ చేశారు. అక్రమాలు నిరూపితమైతే కఠిన చర్యలు తీసుకోవాలని గవర్నర్ దృష్టికి తీసుకువచ్చారు. ఈ అంశంపై గవర్నర్ సానుకూలంగా స్పందించినట్లు బీఆర్ఎస్ నేతలు తెలిపారు. రాష్ట్రంలో ప్రజా సంపదను రక్షించేందుకు అవసరమైన చర్యలు తీసుకుంటామని హామీ ఇచ్చినట్లు పేర్కొన్నారు. అక్రమ మైనింగ్ వ్యవహారంపై తమ పోరాటం కొనసాగుతుందని, పూర్తి స్థాయి విచారణ జరిగే వరకు వెనక్కి తగ్గబోమని బీఆర్ఎస్ స్పష్టం చేసింది.