హైడ్రా ప్రజావాణికి 58 ఫిర్యాదులు
రహదారులు, కాలువల ఆక్రమణలపై ఆందోళన
పలు ప్రాంతాల్లో నివాసితుల ఫిర్యాదులు వెల్లువ
చర్యలకు హైడ్రా కమిషనర్ ఆదేశాలు
హైదరాబాద్, మార్చి 30 (డిజైనర్ టెక్ గురు ప్రతినిధి): నగర పరిసర ప్రాంతాల్లో కాలనీల రహదారులు, పార్కులు, కాలువలపై కబ్జాలు పెరుగుతున్నాయని ప్రజలు ఆందోళన వ్యక్తం చేస్తున్నారు. ఈ నేపథ్యంలో హైడ్రా ప్రజావాణికి మొత్తం 58 ఫిర్యాదులు అందినట్లు అధికారులు తెలిపారు. ఈ ఫిర్యాదులను ఏవీ రంగనాథ్ పరిశీలించి సంబంధిత అధికారులకు తక్షణ చర్యలు తీసుకోవాలని ఆదేశించారు. రంగారెడ్డి జిల్లా పెద్ద అంబర్పేట్ మండలం కుంట్లూరు గ్రామంలో 15 ఎకరాల మేర ఏర్పాటు చేసిన అంజనాద్రి నగర్ లేఅవుట్లో రహదారులు, ప్లాట్లు మాయం చేసినట్లు యజమానులు ఫిర్యాదు చేశారు. కొత్తగా పక్కన లేఅవుట్ వేసిన వారు రహదారిని ఆక్రమించి తమ లేఅవుట్లో కలిపేశారని ఆరోపించారు.
తుర్కయాంజల్, మన్నెగూడ ప్రాంతాల్లో రహదారులపై ఆక్రమణలు జరుగుతున్నాయని ప్రజలు తెలిపారు. 30 అడుగుల రహదారిని ఆక్రమించి ట్రాన్స్ఫార్మర్, గుడి ప్రహరీ నిర్మించారని ఫిర్యాదులో పేర్కొన్నారు. రహదారి కోసం మళ్లీ డబ్బులు చెల్లించాలంటూ ఒత్తిడి తెస్తున్నారని బాధితులు వాపోయారు. హయత్నగర్ మండలం వనస్థలిపురం పరిధిలో మురుగు, వరద కాలువలను మూసివేయడంతో కాలనీలు నీటమునిగే పరిస్థితి ఏర్పడుతోందని ఫిర్యాదు చేశారు. అలాగే పటాన్చెరు, నాచారం, మల్లాపూర్ ప్రాంతాల్లో కూడా రహదారులు, పార్కులపై ఆక్రమణలు పెరుగుతున్నాయని నివాసితులు తెలిపారు. రాజేంద్రనగర్ జోన్ అత్తాపూర్ సర్కిల్లోని టీఎన్జీవో కాలనీలో పార్కు స్థలాన్ని, 40 అడుగుల రహదారిని ఆక్రమిస్తున్నారని ఫిర్యాదులు అందాయి. అలాగే బుద్వేల్ గ్రామంలో వరద కాలువను కబ్జా చేస్తున్నారని ప్రజలు పేర్కొన్నారు.
ఈ ఫిర్యాదులన్నింటిని పరిశీలించిన హైడ్రా కమిషనర్ ఏవీ రంగనాథ్ సంబంధిత శాఖల అధికారులకు బాధ్యతలు అప్పగించారు. ఆక్రమణలను తొలగించి ప్రజలకు సౌకర్యాలు కల్పించేలా చర్యలు తీసుకోవాలని స్పష్టం చేశారు. నగరాభివృద్ధికి ఆటంకం కలిగించే ఇలాంటి కబ్జాలను సహించబోమని అధికారులు హెచ్చరించారు.