త్రివిధ దళాల సంయుక్త విన్యాసం ‘ద్వీప్ శక్తి’ విజయవంతం

తీర ప్రాంత రక్షణలో సమగ్ర సామర్థ్యాల ప్రదర్శన
ఆర్మీ, నేవీ, వైమానిక దళాల సమన్వయ కార్యాచరణ
ఆధునిక సాంకేతికతతో అత్యాధునిక విన్యాసాలు

న్యూఢిల్లీ, మార్చి 30 ((భారతవాసి న్యూస్): భారత తీర ప్రాంతాలు, ద్వీపాల రక్షణను మరింత బలోపేతం చేసే దిశగా త్రివిధ దళాలు సంయుక్తంగా నిర్వహించిన ‘ద్వీప్ శక్తి’ విన్యాసం విజయవంతంగా ముగిసింది. మార్చి 24 నుంచి 28 వరకు జరిగిన ఈ అత్యాధునిక సైనిక విన్యాసంలో భారత సైన్యం, భారత నౌకాదళం, భారత వైమానిక దళం సమన్వయంతో పాల్గొన్నాయి. ఈ విన్యాసంలో తీర ప్రాంత రక్షణ, ద్వీపాల భద్రత, అత్యవసర ప్రతిస్పందన సామర్థ్యాలను పరీక్షించారు. సంయుక్త దళాలు అమ్ఫిబియస్ దాడులు, సముద్ర ఆధిపత్య ఆపరేషన్లు, క్లిష్టమైన బీచ్ ల్యాండింగ్ వ్యూహాలను విజయవంతంగా అమలు చేశాయి. అత్యాధునిక పరికరాలు, డ్రోన్ సాంకేతికత వినియోగంతో ఈ విన్యాసం నిర్వహించబడింది. యుద్ధ పరిస్థితుల్లో వేగంగా స్పందించే సామర్థ్యం, ఖచ్చితత్వం, దళాల మధ్య సమన్వయం ఈ విన్యాసంలో స్పష్టంగా ప్రతిఫలించింది.
ఈ విన్యాసం ద్వారా త్రివిధ దళాల మధ్య సమగ్ర కార్యాచరణ పద్ధతులు మరింత మెరుగుపడ్డాయి. టాక్టిక్స్, టెక్నిక్స్, ప్రొసీజర్లను సవరించి భవిష్యత్తు సవాళ్లకు సిద్ధంగా ఉండేలా చర్యలు తీసుకున్నారు. దేశ సముద్ర సరిహద్దులు, ద్వీపాల భద్రతను కాపాడడంలో ఈ విన్యాసం కీలకంగా మారనుంది. బహుళ రంగాల్లో సమన్వయంతో పనిచేసే సామర్థ్యాన్ని ఈ కార్యక్రమం మరింత బలోపేతం చేసింది. భారత సాయుధ దళాలు అత్యాధునిక సాంకేతికతను వినియోగిస్తూ దేశ భద్రతకు కట్టుబడి ఉన్నాయని అధికారులు తెలిపారు. భవిష్యత్తులో కూడా ఇలాంటి సంయుక్త విన్యాసాలు నిర్వహిస్తూ సైనిక శక్తిని మరింత పెంపొందించనున్నట్లు పేర్కొన్నారు.