రష్యా నౌకకు అనుమతి ఇచ్చిన ట్రంప్
ఆంక్షల సడలింపుతో కొత్త పరిణామం
క్యూబాపై వ్యాఖ్యలతో రాజకీయ ఉద్రిక్తత
న్యూఢిల్లీ, మార్చి 30 ((భారతవాసి న్యూస్): క్యూబాకు వెళ్లే రష్యా చమురు నౌకకు అనుమతి ఇస్తున్నట్లు డొనాల్డ్ ట్రంప్ ప్రకటించారు. ఇప్పటివరకు క్యూబాకు చమురు రవాణాపై అమెరికా విధించిన ఆంక్షలు అమల్లో ఉండగా, తాజాగా వాటిని సడలిస్తూ కీలక నిర్ణయం తీసుకున్నారు. దీంతో అంతర్జాతీయంగా ఈ అంశం ప్రాధాన్యత సంతరించుకుంది. 7.3 లక్షల బ్యారెళ్ల ముడి చమురుతో రష్యా నౌక ‘అనాటోలీ కొలోడ్కిన్’ మార్చి 8న రష్యా పోర్ట్ నుంచి బయలుదేరింది. ఇంగ్లీష్ ఛానల్ దాటి అట్లాంటిక్ మహాసముద్రంలోకి ప్రవేశించిన ఈ నౌక క్యూబాకు చేరడంపై ఇప్పటివరకు అనిశ్చితి నెలకొంది.
అమెరికా ఆంక్షల కారణంగా ఈ నౌక గమ్యస్థానానికి చేరుతుందా లేదా అన్న సందేహాలు వ్యక్తమయ్యాయి. ఈ నేపథ్యంలో ట్రంప్ స్పందిస్తూ, క్యూబాకు చమురు సరఫరా చేసే విషయంలో తమకు అభ్యంతరం లేదని తెలిపారు. అది రష్యా అయినా, ఇతర దేశమైనా తమకు సమస్య లేదని స్పష్టం చేశారు. అయితే ట్రంప్ చేసిన మరో వ్యాఖ్య చర్చనీయాంశమైంది. క్యూబా ప్రభుత్వం త్వరలో కూలిపోతుందని ఆయన వ్యాఖ్యానించారు. ఈ వ్యాఖ్యలు అంతర్జాతీయ రాజకీయ వర్గాల్లో తీవ్ర చర్చకు దారితీశాయి.
తర్వాత అమెరికా నుంచి మరో ప్రకటన వెలువడింది. రష్యా చమురు నౌకను క్యూబాకు అనుమతిస్తున్నట్లు అధికారికంగా ప్రకటించారు. దీంతో ఈ నౌక మంగళవారం క్యూబాకు చేరుకునే అవకాశం ఉందని సమాచారం. ఇక వెనెజువెలా అధ్యక్షుడు నికోలాస్ మదురోను అమెరికా అదుపులోకి తీసుకున్న తర్వాత ఆ దేశానికి చమురు సరఫరా నిలిచిపోయింది. ఈ నేపథ్యంలో క్యూబా చమురు అవసరాల కోసం ఇతర దేశాలపై ఆధారపడాల్సి వస్తోంది. తాజా నిర్ణయం భవిష్యత్తులో మరిన్ని రాజకీయ పరిణామాలకు దారితీయవచ్చని విశ్లేషకులు భావిస్తున్నారు.